Dkt. Samia ajenga Makumbusho ya Hayati Magufuli Chato

Rais wa Tanzania Dr. Samia Suluhu Hassan amejenga kituo cha makumbusho ya aliyekuwa rais wa awamu ya tano hayati Dr. John Magufuli kama sehemu ya kumuenzi kwa kazi alizolitendea akiwa rais wa jamhuri ya muungano wa Tanzania.

hayo yamebainishwa jana wakati wa misa takatifu ya kumuombea na kumuenzi hayati Magufuli iliyofanyika Chato na kuhudhuriwa na wananchi, viongozi wa dini na serikali huku Naibu waziri mkuu Dr. Dotto Biteko akimwakirisha Rais Samia katika ibada hiyo ikiwa ni miaka mitatu tangu Dr. Magufuli alipofariki dunia

Familia ya Hayati Dr. John Pombe Magufuli ikiongozwa na Janeth Magufuli na wana jamii wengine wamshukuru Rais kwa kuendelea kumuenzi Hayati Magufuli

Mbunge wa Chato, Mhe. Dkt. Medard Kalemani amemshukuru Rais, Dkt. Samia Suluhu Hassan kwa kuendelea kuijali wilaya ya Chato kwani pamoja kuitembelea Chato mara kwa mara, ameendelea kutoa fedha zinazotekeleza miradi mbalimbali kama ya maji, shule, afya ( hospitali ya kanda), barabara n.k

Aidha, amemshukuru Dkt. Samia kwa kuendelea kumuenzi Hayati Dkt. John Pombe Magufuli kwa namna mbalimbali ikiwemo kujenga makumbusho ya Hayati Magufuli wilayani Chato ambayo itafanya historia yake na kazi alizofanya kuendelea kujulikana ndani na nje ya nchi,  kizazi cha sasa na cha baadaye 

Naibu Waziri Mkuu na Waziri wa Nishati, Mhe. Dkt. Doto Biteko leo amejumuika na viongozi na wananchi mbalimbali katika misa Takatifu ya kumwombea  Rais wa Awamu ya Tano, Hayati Dkt. John Pombe Magufuli iliyofanyika katika Kanisa  Katoliki, Parokia ya  Mt. Yohana  Maria Muzeyi, wilayani Chato mkoani Geita.

Akitoa Salaam za Rais, Dkt. Samia Suluhu Hassan,  Dkt. Biteko amesema kuwa, Dkt. Samia na Serikali yake inaendelea kumkumbuka  Hayati Dkt. John Pombe Magufuli si tu kama Rais katika Serikali Awamu ya Tano, bali pia kama kiongozi aliyeweka misingi mbalimbali ambayo Serikali ya Awamu ya Sita inaendelea kuitekeleza. 

Naibu Waziri Mkuu na Waziri wa Nishati, Mhe. Dkt. Biteko (kushoto) akizungumza na Mjane wa Dkt. John Pombe Magufuli, Mama Janeth Magufuli mara baada ya misa Takatifu ya kumwombea  Rais wa Awamu ya Tano, Hayati Dkt. John Pombe Magufuli iliyofanyika katika Kanisa  Katoliki, Parokia ya  Mt. Yohana  Maria Muzeyi, wilayani Chato mkoani Geita.

Ametaja miradi mbalimbali ambayo ilianzishwa katika Serikali ya Awamu ya Tano ambayo inaendelea kutekelezwa kwa kasi kubwa na Serikali ya Awamu ya Sita, ni pamoja na mradi wa umeme wa Julius Nyerere ( JNHPP) ambao sasa umeshaanza kuzalisha megawati 235, mradi wa ujenzi wa Reli ya Kisasa (SGR) kutoka Dar es Salaam ambao tayari umeshaanza kufanyiwa  majaribio na ujenzi wa Daraja kubwa la Kigongo-Busisi mkoani Mwanza  ambao umefikia asilimia 80. 

Dkt. Biteko amewahakikishia Watanzania kuwa, masuala yaliyobuniwa na Hayati Magufuli yanaendelea na yataendelea kutekelezwa  kwa kasi kubwa na Serikali ya Awamu ya Sita ili kuendelea kumuenzi kwa vitendo. 

“Hayati Magufuli anasifika kote duniani kwa uwezo wake wa kiongozi, karama ya kutatua matatizo ya wananchi, kuwasikiliza wananchi, kuondoa kero, uzembe, ubadhirifu, rushwa na kuhimiza uwajibikaji serikalini, nataka niwahakikishie kuwa, Serikali ya Awamu ya Sita inayasukuma masuala yote hayo ili kutoa huduma kwa ufanisi kwa watanzania.” Amesisitiza Dkt. Biteko

Vilevile, amempongeza, Mjane wa Hayati Magufuli, Mama Janeth  Magufuli kwa kuendelea kusimama kama mhimili wa familia na kuendelea kuunganisha na kuiongoza familia hiyo.  

Kwa upande wake, Mjane wa Hayati Magufuli, Mama Janeth Magufuli amemshukuru Rais Dkt. Samia Suluhu Hassan kwa kuwa pamoja na familia hiyo tangu kifo cha Hayati Magufuli ambapo pia amewashukuru  viongozi waliojumuika na familia katika adhimisho hilo la misa Takatifu, akieleza kuwa hiyo ni alama ya  upendo kwa familia hiyo.

Huu ni mwaka wa Tatu tangu Hayati, Dkt. John Pombe Magufuli afariki dunia tarehe 17 Machi, 2021. 

Misa hiyo ilihudhuriwa na viongozi mbalimbali  akiwemo Mkuu wa Mkoa wa Geita, Martine Shigella,  Waziri wa Ujenzi, Innocent Bashungwa na Mbunge wa Chato, Mhe. Dkt. Medard Kalemani.