Mhe. Mhagama ajitosa kutatua changamoto za wauguzi

Waziri wa afya Mhe. Jenista Mhagama amewahakikishia   wauguzi na wakunga kutatua  changamoto ya upandishwaji wa madaraja ili wafanane na kada nyingi za sekta mbalimbali

Mhe. Jenista Mhagama amesema hayo  leo Oktoba 17, 2024  Jijini Dodoma alipokutana na  Uongozi wa Chama cha Wauguzi na Wakunga Tanzania (TANNA) na kujadili mpango kazi wa utekelezaji wa hoja za wauguzi zilizo jitokeza wakati wa mkutano wa mwaka uliofanyika  Mei, 12, 2024 kwa lengo la kuongeza ubora wa huduma za Afya.

Mhe. Mhagama ameongeza  kuwa anatambua mchango na kazi kubwa  ya wauguzi na wakunga katika sekta ya afya na kuwapongeza kwa kazi nzuri wanayofanya ya kuhudumia wananchi katika sekta hiyo .

 “Wakati tunafanyia kazi changamoto zenu tusaidieni kusimamia maadli kwa wauguzi ili kuleta ufanisi katika utendaji kazi" amesema   Mhe.Mhagama

Aidha  Mhe. Muhagama amesema moja ya jukumu ambalo wizara ya Afya inafanyia  kazi kwa sasa ni kuhakikisha wauguzi na wakunga wanapandishwa madaraja kama ilivyo kwa kada zingine.

Amesisitiza kuwa serikali itaendelea kutafuta uvumbuzi wa changamoto zote zinazowakabili wauguzi na wakunga hivyo kuwataka kuendelea kuchapa kazi kwa kuzingatia miiko na maadili ya taaluma yao.

Kwa upande wake rais wa Chama cha Wauguzi na  Wakunga Tanzania ( TANNA), Alexender Baluhya amesema kuwa wauguzi na wakunga wanaimani na serikali inayoongozwa na Dkt. Samia Suluhu Hassan kuwa ni sikivu na itatatua changamoto zao kwa wakati ili kuleta tija katika utendaji kazi wao

Lengo la Mkutano huo wa  Mhe. Mhagama  na Uiongozi wa wauguzi na wakunga ni kufatilia utekelezaji wa hoja  zilizotolewa katika mkutano wa mwaka uliofanyika pale Mkoani Tanga na moja ya hoja zilizotolewa  ni pamoja na kuomba  kupandishwa madaraja kama ilivyo kwa kada nyingine

Mwandishi: Harieth Kamugisha

Mhariri: Prosper Kwigize