Jamii yaaswa kuzingatia mlo kamili ili kuepuka NCDs

Jamii imetahadharishwa kuepuka ulaji usiozingatia makundi sita ya chakula kwani unasababisha Ongezeko la magonjwa yasiyo ya kuambukiza (NCDs) ambayo yanaongezeka katika jamii kwa kasi.

Akizungumza na Buha News, Mratibu wa elimu ya afya kwa Umma Halmashauri ya mji Kasulu, Mkoani Kigoma Mwita  Range, amesema kwasasa magonjwa yasiyo ya kuambukiza (NCDs) yamekuwa yanaongezeka kwa kasi katika vituo mbalimbali vya afya ikiwa ni Matokeo ya Mtindo wa maisha wa jamii.

“Hivi Karibuni Katika vituo vyetu vya afya kumekuwa na ongezeko la wateja wanaofika wakisumbuliwa na maradhi haya, yasiyo ya kuambukiza na kwa bahati mbaya magonjwa haya hayana matibabu ya moja kwa moja, kwahiyo Kitu kikubwa cha kuzingatia ni kuepuka visababishi vyake kwa kula mlo wenye Wanga ,protin,mbogamboga,Matunda  na mafuta  na sukari  kwa kiwango kidogo” amesema Mratibu wa elimu ya afya kwa Umma Mwita Range.

Mratibu huyo wa elimu ya afya kwa umma, amesema mlo usiozingatia makundi sita ya chakula na kutokufanya mazoezi ni chanzo kikubwa cha ongezeko la magonjwa yasiyoambukiza (NCDs) ikiwemo Kisukari,Kansa na magonjwa moyo.

“Watu wengi kwasasa wanatumia zaidi vyakula vya viwanndani au vyakula vilivyopitia mchakato mrefu ambavyo vikiliwa kwa wingi zaidi ya vyakula vya asili vinasababisha Magonjwa yasiyo ambukiza, pia watu wanatumia zaidi vyombo vya usafiri na hawafanyi mazoezi hii ni hatari” ameongeza Mratibu wa elimu ya afya kwa Umma Range

Bw.Range amesema mtu akishindwa kabisa angalau ale makundi manne ya siku,alafu makundi mengine anaweza kuyatumia  siku inayofuata, Pia ameshauri wananchi kuzingatia matumizi ya chumvi yenye madini chuma na kuwa na tabia ya kupima afya angalau mara moja kwa mwaka.

“Magonjwa yasiyoambukiza hayana dalili za haraka,yanaweza kutambulika  hata baada ya miaka 5 hivyo nishauri watu kuhakikisha wanapima afya zao angalau mara moja kwa mwaka”

Hata hivyo baadhi wa wananchi waliohojiwa  na Buha News mjini Kasulu  ambao hawakupenda kutaja majina yao, walikiri kusikia na kuona wagonjwa wenye Kisukari na moyo japo hawakufahamu juu ya chanzo cha magonjwa hayo.

"Mimi binafsi sijui kama yanauhusiano wa chakula na wala sijui chanzo chake ila nimeona wagonjwa wa Kisukari,ugonjwa wa moyo nasikia unasababisha na msongo wa mawazo” alisema moja ya wananchi hao.  

 Januari 10 mwaka huu Waziri wa Afya kutoka Serikali ya Mapinduzi Zanzibar Mhe. Nassor Mazrui wakati wa Uzinduzi wa Utafiti wa Kitaifa wa Viashiria vya Magonjwa Yasiyoambukiza (STEPS SURVEY 2023) uliofanyika kwenye ukumbi wa Tawimu Jijini Dodoma alisema 

Magonjwa Yasiyoambukiza (NCDs) yanachangia takribani asilimia 33 ya vifo vyote nchini huku kwa takwimu za Shirika la Afya duniani (WHO) kwa mwaka 2020 zinaonesha kuwa magonjwa hayo yalichangia zaidi ya vifo milioni 41 sawa na asilimia 71 ya vifo vyote Duniani ukilinganisha na vifo milioni 57 kwa mwaka 2016 duniani.

Mhe. Mazrui alisema takwimu zinaonesha kuwa magonjwa hayo yameongezeka mara 5 hadi 9 zaidi kati ya miaka ya 80 ambapo asilimia 1 tu ya watanzania walikuwa na tatizo la kisukari na asilimia 5 walikuwa na tatizo la shinikizo la juu la damu wakati kwa sasa tatizo la kisukari limefikia asilimia 9 na tatizo la shinikizo la juu la damu limeongezeka na kufikia asilimia 25.

Mwandishi; Harieth Dominick

Mhariri; Ramadhani Zaidy